Премиерот очекува проширување на истрагата со загадената вода во Гостивар. Тој во изјава дадена денеска во Дебар рече дека многу скоро очекува Гостивар да добие и чиста вода за пиење.
Тврди дека хиперхлорирањето го вршат стручни лица од Водовод и канализација по предупредувањата од лидерот на СДСМ Венко Филипче дека хиперхлорирањето го вршат нестручни луѓе и дека тоа може да предизвика малигни заболувања.
Обвини дека во минатото ниту една институција не постапила во однос на добиените резултати од анализите за водата.
– Во Собранието покажавме документи од минатото кога ниту Министерството за здравство во Владата на СДСМ и ДУИ, ниту Агенцијата за храна и ветеринарство, ниту било која институција постапувала по информациите коишто се добиени како резултат на мерењата каде што во стотици и илјадници случаи во речиси сите мерни места во неколку општини е констатирано дека параметрите и микробиолошки, но и според квалитетот на водата, не соодветствуваат на законски дозволените норми. И никој ништо не превземал, туку оставиле буквално луѓето да го консумираат тоа и да има последици во процесот на консумирање, изјави Мицкоски.
