Израелскиот премиер Бенјамин Нетанјаху денеска соопшти дека Израел не се согласил со планот на Комитетот за мир во Газа, формиран од американскиот претседател Донал Трамп.
„Претседателот Трамп мисли, или неговиот тим мисли, дека може да го принудат Хамас да се разоружа и да ја демилитаризира Газа. Ние го разгледуваме тоа. Ни испратија нацрт. Не се согласивме со него. Тоа не беше наш нацрт. Ги вративме нашите коментари“, рече Нетанјаху во видео објавено на Фејсбук.
Тој ги повтори ставовите што се појавија во медиумите во текот на изминатите неколку дена, а беа припишани на „високи израелски функционери“, наведувајќи дека Израел нема да се повлече „од сегашните линии“ во Газа „додека Хамас целосно не се разоружа“.
Тоа е спротивно на планот за разоружување, кој бара од Израел да се повлече на Жолтата линија во Газа, како што направи согласно договорот со Хамас за прекин на огнот и ослободување на заложниците од октомври 2025 година, но оттогаш ја прошири својата контрола врз Појасот од 53 отсто на над 60 отсто.
Иако Комитетот за мир посочи дека Израел нема да мора да се повлече преку првобитната Жолта линија додека Хамас барем не почне да го предава оружјето, Нетанјаху изјави дека израелските сили нема воопшто да се повлечат додека исламистичкото движење целосно не се разоружа.
Висок американски функционер на прес-конференција минатата недела рече дека предлогот за разоружување е продолжување на планот од 20 точки на Трамп за ставање крај на војната во Газа, кој Израел веќе го прифати минатата есен, и дека, соодветно на тоа, од Израел само се бара да се придржува до него.
