Екстремен топлотен бран продолжува да ги погодува централна и источна Европа, при што неколку земји соборуваат температурни рекорди, додека сушите и високите температури предизвикаа енергетски проблеми и го зголемија ризикот од шумски пожари, пишува „Гардијан“.
Словачка, Австрија и Унгарија забележаа рекордни температури.
Словачката хидрометеоролошка агенција соопшти дека вчера во Долне Плахтинце се измерени рекордни 42 степени Целзиусови.
Во Полска, властите беа принудени привремено да ги затворат електраните на јаглен Кожење и Поланец поради екстремно ниските нивоа на вода во реката Висла, што ја ограничи достапноста на вода за ладење на електраните.
Ова отстрани околу 1,3 гигавати капацитет од електроенергетскиот систем.
Полскиот премиер Доналд Туск ги повика работодавците да ги заштитат работниците за време на топлотниот бран и да обезбедат климатизација и доволни количини ладна вода.
Во Германија, климатските активисти протестираа пред канцеларијата на канцеларот, барајќи поголеми владини мерки за заштита на населението од екстремни температури.
Според новите проценки од Институтот „Роберт Кох“, околу 11.900 луѓе во земјата починале од болести поврзани со топлина ова лето.
Во Унгарија, премиерот Петер Маѓар објави дека нуклеарната централа Пакш, која беше привремено затворена, ќе биде рестартирана.
Тој исто така рече дека нивото на Дунав се зголемило, но дека сè уште се очекува голема потреба од намалување на потрошувачката на електрична енергија.
Експертите предупредуваат дека продолжената топлина и суша, влошени од климатската криза, вршат голем притисок врз населението, инфраструктурата и природата.
Еколозите истакнуваат дека енергетските системи базирани на фосилни горива сè повеќе страдаат од екстремни временски услови.
Топлинските бранови дополнително ја исушија вегетацијата и го зголемија ризикот од пожари.
Според Европскиот информативен систем за шумски пожари, околу 500.000 хектари изгореле во Европската Унија од почетокот на годината, главно во Шпанија и Франција, додека дополнителни 292.000 хектари изгореле во Украина.
Австрија во среда забележа рекордна температура од 41,2 степени Целзиусови, а обемот на пожарите е повеќе од двојно поголем од претходниот рекорд за ова време од годината.
Во Чешка, условите за гаснење пожари беа за повеќе од 50 проценти полоши отколку порано, додека во Словачка беа за 32 проценти полоши.
Според анализата на Светскиот метеоролошки конзорциум за атрибуција, глобалното затоплување ги направи условите за екстремна топлина, суша и ветер од минатиот месец најмалку 20 пати поверојатни во Шпанија и двојно поверојатни во Франција.
