Холивудската актерка Хејден Панетиер и нејзиното поранешно момче Брајан Хикерсон патувале заедно во Јужна Каролина само еден ден пред актерката да почине на 36-годишна возраст, додека истрагата за причината за нејзината смрт е сè уште во тек, пишува британски „Мирор“.
Актерката, која требаше да го прослави 37-от роденден овој петок, почина вчера. Истрагата за причината за смртта е во тек, иако полицијата соопшти дека прелиминарната истрага „не покажала никакви знаци на насилство или сомнителни околности“.
Хејден наводно патувала од Лос Анџелес во Јужна Каролина во саботата со Брајан, агент за недвижности, и нејзиниот повремен партнер, кој потекнува од таа држава.
Во соопштението од полициската станица Гринвил се наведува:
„Полицајците, заедно со екипите за итни случаи, одговориле на пријава за женско лице кое не покажувало знаци на живот околу 13:50 часот во недела. По пристигнувањето, ѝ била укажана медицинска помош, но лицето, подоцна идентификувано како Хејден Панетиер, било прогласено за мртво на местото на настанот.
Прелиминарната истрага не открила никакви знаци на насилство или сомнителни околности, но се наведува дека познаник на г-ѓа Панетиер се јавил на 911.“
Според пишувањето на порталот ТМЗ, Хајден се жалела на болки во грбот изминатата година. Нејзиниот претставник потврдил дека властите ги истражуваат околностите на нејзината смрт, а повеќе информации се очекуваат по дополнителната истрага.
„Истрагата е во тек. Треба да знаеме повеќе утре“, изјавил нејзиниот претставник за „Ен-би-си њуз“.
Таткото на актерката, Скајп Панетиер, се огласи по трагичната вест и ѝ оддаде почит на својата ќерка.
„Со длабока тага објавуваме дека нашата сакана Хејден почина. Таа беше неверојатна светлина и имаше силна природа која донесе огромна љубов и радост на сите што ја познаваа, како и на милионите луѓе што ја гледаа на екранот“, рече тој.
Тој побара приватност за да може семејството да „ја процесира оваа незамислива загуба“.
Хејден и Брајан Хикерсон беа во врска од 2018 до 2022 година, а нивната врска беше обележана со инциденти на семејно насилство и апсења.
Хикерсон беше осуден на 45 дена затвор во април 2021 година откако се изјасни за виновен по две точки за напад врз сопружник или девојка.
И покрај неговото бурно минато, Хикерсон откри во мај оваа година дека сè уште сонува да се ожени со Хејден, но исто така призна дека ја злоставувал.
Кога ТМЗ го праша дали некогаш размислувал да се ожени со Хејден, тој одговори:
„Да, секако… се надевам. Таа најверојатно не мисли така.“
Сепак, тој призна дека обновата на нивната романтична врска не би била здрава за ниту еден од нив.
