Комарците се сметаат за опасни затоа што пренесуваат болести како што се маларија, денга треска и вирусот Западен Нил, кои предизвикуваат повеќе од милион смртни случаи годишно, пишува ScienceAlert.
Научниците од Меѓународниот универзитет во Флорида спроведоа истражување, објавено во списанието iScience, за да откријат зошто некои луѓе се неодоливи за комарците. Во експериментот учествувале 119 волонтери од Мајами. Секој од нив ја ставал раката во олфактометар, долга цевка во која имало три вида комарци: Aedes aegypti, Aedes albopictus и Culex quinquefasciatus.
Aedes aegypti е познат како комарец на жолтата треска. Најчест е во тропските и суптропските региони, живее во близина на луѓе и е најактивен наутро и рано навечер. Може да пренесува денга, зика, чикунгуња и жолта треска.
Aedes albopictus е азиски тигрест комарец, препознатлив по своите црно-бели пруги. Добро ја толерира постудената клима и е многу активен во текот на денот. Може да пренесува денга, зика и чикунгуња.
Culex quinquefasciatus е вид домашен комарец кој е најактивен од самрак до зори. Се размножува во застоена често загадена вода, а во некои делови од светот може да го пренесе вирусот Западен Нил и други болести.
Различни преференции на различни видови
Познато е дека комарците се привлечени од човековиот мирис, кој се создава со интеракција на бактерии на кожата и секрети без мирис. Оваа комбинација создава испарливи органски соединенија. Бидејќи има повеќе од 1.000 такви соединенија на човечката кожа, а познати се околу 3.600 видови комарци, на научниците им беше тешко точно да утврдат што точно влијае на привлечноста.
Неврогенетичарот Метју ДеЏенаро и неговиот тим на Универзитот во Мајами истакнуваат дека ова е прва студија што директно ја споредува привлечноста на мирисите на поединците кон повеќе видови комарци со нивните микробиоми на кожата. Резултатите покажаа дека видот Aedes aegypti покажал мала преференција кон мажите, додека другите два вида немале преференција според полот.
Интересно е што учесниците кои биле привлечни за еден вид комарец не биле нужно привлечени за другите два. Иако постоела слаба врска помеѓу привлечноста на Ae. aegypti и Ae. albopictus, општиот заклучок бил дека секој вид претпочита различна група луѓе.
Три бактерии што ги сакаат комарците
Анализата на испарливите органски соединенија покажала дека видовите Ae. aegypti и Cx. quinquefasciatus веројатно избегнувале поединци со одредени соединенија, додека видот Ae. albopictus го привлекувале специфичен сет на миризливи соединенија. Со анализа на микробиомите на кожата на учесниците, истражувачите идентификувале 246 различни бактериски групи. Иако сите учесници делеле само еден вид бактерии, резултатите откриле клучен модел.
„Кај видовите Ae. aegypti, Ae. albopictus и Cx. quinquefasciatus, пронајдовме три клучни бактерии заеднички за учесниците кои беа многу привлечни за комарците, додека ниедна не беше пронајдена во микробиомите на помалку привлечни поединци. Овие бактериски групи, Co. kefirresidentii, Cu. granulosum и Staphylococcus epidermidis, може да послужат како општ сигнал за комарците дека пред нив е привлечен домаќин“, напишаа авторите на студијата.
Иако се потребни повеќе истражувања за целосно да се разбере врската помеѓу мирисите, бактериите и привлечноста за комарците, секое ново откритие го отвора патот за подобра заштита.
Овие резултати би можеле да помогнат во развојот на нова генерација на средства за репеленти на инсекти или дури и методи за модифицирање на микробиомот на кожата за да ги направат луѓето помалку привлечни за комарците.
