Кралот Артур – владетелот на Камелот, бранителот на Британија, сопственикот на легендарниот Екскалибур и трагачот по Светиот Грал – е една од најпрепознатливите фигури во светската митологија. Неговата приказна е раскажана безброј пати во книги, филмови, ТВ серии и видео игри. Но, зад легендата лежи прашање кое со векови ги интригира историчарите и љубителите на мистерии: дали Артур навистина постоел?
За жал, нема дефинитивен одговор. Иако многумина веруваат дека зад легендата стоел вистински владетел, не се пронајдени историски докази за постоењето на кралот Артур.
Самата приказна значително се променила низ вековите. Во најраните приказни, Артур е моќен воен водач кој ги води Британците во битки против напаѓачките Саксонци. Подоцна, се појавуваат познатите Камелот, Ланселот, Светиот Грал, Екскалибур и Витезите од Тркалезната маса. Овие елементи биле додадени векови подоцна за да се трансформира суровиот воин во идеализиран витез и владетел од легендата.
Еден од најважните автори кои го обликувале ликот на Артур бил Џефри од Монмут. Во 12 век, тој го опишал неговиот живот, но дури и тогаш бил обвинет за мешање на различни велшки традиции и измислување делови од приказната. Како резултат на тоа, неговиот Артур повеќе личи на мешавина од многу легенди отколку на историски веродостојна личност.
Сепак, постојат неколку интересни индиции. Во велшката поема „Y Gododdin“, напишана околу 540 до 640 година, паднат воин е спореден со херој по име Артур. Ова може да сугерира дека во тоа време постоела прилично добро позната личност со тоа име.
Друг извор од истиот период раскажува за воениот водач Амброзиј Аврелијан кој ги предводел Британците во победничка битка против Саксонците. Сепак, неколку века подоцна, монахот Нениј го идентификува Артур како водач во истата битка и го поврзува со уште 11 битки.
Дали е можно овие приказни да се основа на легендата? Сосема е можно. Некои истражувачи сугерираат дека зад ликот на Артур можеби стои вистински воен водач од 5-ти или 6-ти век. Други веруваат дека легендата ги собрала приказните за неколку различни личности во една слика. Сепак, досега нема докази што потврдуваат дека точниот крал Артур што го знаеме од легендите некогаш постоел, пишува IFL Science.

