Пред почетокот на турнирот, постоеше загриженост околу високите цени на билетите за натпреварите, а гласините беа дополнително поттикнати од забелешките дека некои седишта биле празни за натпреварите меѓу Јужна Кореја и Чешка во четврток во Гвадалахара и Катар и Швајцарија во сабота во Сан Франциско.

Сепак, ФИФА изјави дека на првите 16 натпревари присуствувале 1.028.429 навивачи, што значи пополнетост на капацитетот од дури 99,34 проценти.

Претседателот на ФИФА, Џани Инфантино, објави фотографија на Инстаграм на која е со Арон Брен, милионитиот навивач на турнирот.

„Голема благодарност до сите наши страствени навивачи кои продолжуваат да ги полнат стадионите. Вие го оживеавте најинклузивното Светско првенство“, напиша Инфантино.

Од друга страна, европското здружение на навивачи FSE предупредува на ризиците од недоволно одвојување на навивачите на двата тима на натпреварите.

„Загрижувачки е што при купување и препродажба на билети, ФИФА не знае точно кој навивач е во кој сектор. Затоа постои поголем ризик од кога било навивачите на еден тим да се најдат во средината на толпата навивачи на друг тим“, изјави за Би-Би-Си извршниот директор на ФСЕ, Ронан Евајн.

Сепак, ФИФА го истакна фактот дека најлојалните навивачи на националните тимови се заедно на стадионите поради претходната локациска распределба на билетите на навивачите на земјите учеснички.