Македонскиот роман „Тони“ на писателката Румена Буџаровска продолжува да ја гради својата меѓународна книжевна приказна, откако беше најавено дека на 3 септември ќе биде објавен и во Франција преку престижната издавачка куќа „Галимар“, една од најзначајните издавачки институции во Европа и светот.

Во рамки на подготовките за големата француска книжевна сезона, романот веќе бил претставен пред 475 книжари во Франција, како дел од традиционалната културна програма посветена на новите есенски изданија.

Француското издание на книгата ќе биде достапно во превод на Клое Клока Билон, а ова претставува трето дело на истиот македонски автор што ќе биде објавено од „Галимар“, по претходните романи „Мојот маж“ и „Не одам никаде“.

Романот „Тони“ досега бележи значителен успех и во регионот. Во Македонија се објавени четири изданија, секое во тираж од 1.000 примероци, а книгата веќе е достапна и во Србија, Хрватска, Црна Гора и Босна и Херцеговина.

Паралелно, делото неодамна беше објавено и во Шпанија, каде доби позитивен прием и добри критики од книжевната јавност.

Во текот на следната година се очекува романот да биде преведен и објавен и во САД, Грција, Албанија и Португалија, со што „Тони“ продолжува да се пробива на сè поголем број меѓународни пазари.