Германската метеоролошка служба денес ги прошири предупредувањата за топлотни бранови, со температури кои достигнуваат до 38 степени Целзиусови, додека локално силни грмотевици, град и налети на ветер до 100 км/ч се очекуваат во текот на вечерта и ноќта.
На запад и југозапад, температурите ќе достигнат до 38 степени Целзиусови, на крајниот север помеѓу 24 и 29 степени, додека во другите делови од земјата максималната температура ќе биде помеѓу 30 и 35 степени, објавува Шпигел.
За некои региони, вклучувајќи ги Северна Рајна-Вестфалија, Долна Саксонија и делови од Хесен, предупредувањето за екстремна топлина е на сила од 11 часот наутро до 19 часот, додека на крајниот југ, предупредувањата не се на сила во неколку општини.
„Избегнувајте ја топлината доколку е можно. Пијте многу вода и одржувајте ги вашите соби ладни“, предупреди германската метеоролошка служба, додавајќи дека топлината може да биде опасна за вашето здравје.
Прогнозата, исто така, предвидува изолирани силни грмотевици, кои ќе траат до сабота наутро.
Локално се можни обилни врнежи од дожд, град, силен ветер и силни грмотевици, со налети до 100 километри на час што се очекуваат во јужен Баден и Швабија.
Германскиот Црвен крст (DRK) предупреди на потребата од подобра заштита на бездомниците за време на летните горештини, истакнувајќи дека тие немаат пристап до климатизирани простори како повеќето граѓани и ги повика локалните власти да обезбедат ладни засолништа и јавни фонтани за вода за пиење.
Организаторите на фестивалот „Саутсајд“ во Нојхаузен об Ек во Баден-Виртемберг, каде што се очекуваат околу 60.000 посетители, обезбедија дополнителни точки за вода, зони за ладење и крема за сончање, додека на фестивалот „Хесентаг“ во Фулда, медицинските служби го зголемуваат својот капацитет поради високите температури.
Лекарите и организаторите ги повикуваат посетителите да пијат доволно течности, да носат лесна облека, да ги заштитат главите и да избегнуваат директно изложување на сонце во најжешките делови од денот.
За прв пат оваа година, границата од 35 степени Целзиусови беше пробиена во Германија, при што највисоката температура беше регистрирана на 35,6 степени на станицата Сарбрикен-Бурбах, изјави портпаролот на германската метеоролошка служба DWD, истакнувајќи дека ова се прелиминарни податоци.
Во Милхајм на Горна Рајна беа измерени 35,4 степени, додека во близина на границата со Франција беа регистрирани 35,1 степен.
