Австралиската полиција заплени 2,7 тони кокаин скриен во подземна мрежа од бункери во западниот дел на Сиднеј, што се верува дека е најголемата заплена досега, објавија денес локалните медиуми.
Дрогата, со проценета улична вредност од 816 милиони австралиски долари (околу 500 милиони евра), беше пронајдена во петокот складирана во три контејнери скриени во подземни бункери под лажни подови во имот во Лондондери, објави Би-Би-Си.
Двајца мажи, на возраст од 21 и 25 години, кои наводно се обиделе да избегаат од полицијата, беа уапсени на местото на настанот, обвинети за поседување дрога и се соочуваат со доживотен затвор доколку бидат осудени.
Полицијата верува дека кокаинот бил шверцуван во Австралија преку малото гратче Миџ Поинт во Северен Квинсленд по наредба на организирана криминална група.
И покрај својата оддалеченост, Австралија е профитабилен пазар за трговија со дрога, при што кокаинот се продава за околу 300 австралиски долари по грам.
Австралијанците и Новозеланѓаните имаат највисока стапка на употреба на кокаин во светот, според минатогодишниот Светски извештај за дрога на ОН.
