ГЕРМАНИЈА постави апсолутен температурен рекорд со 41,3 степени Целзиусови, кои беа измерени во еден округ на градот Сарбрикен на западот од земјата, според прелиминарните податоци од Метеоролошката служба (DWD). „Оваа вредност е достигната во Германија за прв пат“ откако започнаа метеоролошките мерења, соопшти онлајн услугата Блускај.

Претходниот температурен рекорд од 41,2 степени Целзиусови беше забележан во Германија на 25 јули 2019 година. „И сосема е можно оваа температура повторно да се достигне утре (сабота), ако не и малку да се надмине“, изјави за АФП Уве Баумгартен, метеоролог во DWD.

Откажани настани

Германските метеоролози утрово издадоа предупредувања за силна до екстремна топлина низ целата земја. Најтопол ден се очекува во недела, кога се прогнозираат температури до 42 степени Целзиусови. Метеоролозите предвидуваат дека топлотниот бран ќе трае до почетокот на следната недела.

Спортските и настаните на отворено се откажани во многу делови од земјата поради жештините. Поради високите температури што ја оптоваруваат инфраструктурата на германските железници, тие предупредуваат на можни проблеми и советуваат да не се патува освен во случај на неопходност.

Покрај високите температури, веројатноста за бури од запад постепено ќе се зголемува од сабота со можност за обилни врнежи од дожд, град и силни налети на ветер.