Метрополитен музејот на уметност во Њујорк ќе му оддаде почит на контроверзниот моден дизајнер Џон Галијано во мај, кога ќе ја отвори, како што се наведува во најавата, „првата голема музејска изложба“ на делата на британскиот дизајнер.
Важната културна институција во Њујорк го нарече Галијано „еден од најинвентивните и највлијателните дизајнери во последните 40 години“, според соопштението објавено во петокот.
Но, неговиот живот беше обележан со бројни контроверзии. Во 2011 година, тој даде навредливи и антисемитски изјави во парискиот бар „Ла Перл“, фалејќи го Хитлер, по што беше уапсен, отпуштен од модната куќа Диор и гонет во Франција со условна парична казна.
Оттогаш отворено зборуваше за својата долгогодишна зависност од дрога и алкохол и постепено се враќаше во светот на модата. Порано оваа година, тој потпиша договор со шпанската модна куќа Зара.
Дизајнерот е роден во Гибралтар во 1960 година. Тој беше главен дизајнер во разни модни куќи, вклучувајќи ги Живанши и Диор, а потоа основа бренд и го именуваше по себе – Џон Галијано.
Галијано е само третиот дизајнер кој е награден во текот на својот живот на Мет Гала, по Ив Сен Лоран и Реј Кавакуба.
Мет Балот, често опишуван како „забава на годината“, е собирање средства за Институтот за костими. Тоа е спектакл исполнет со ѕвезди што традиционално се одржува првиот понеделник во мај.
Приходите од добротворниот настан, проценети на неколку милиони долари, го сочинуваат годишниот буџет на Институтот, кој затоа е именуван по неговата организаторка и долгогодишна главна уредничка на „Вог“, Ана Винтур.
Таа е домаќин на Галата и е голем поддржувач на Галијано.
