Претседателот на САД, Доналд Трамп, за време на викендот ја разгледуваше можноста за напад врз Хутите во Јемен, но доцна во саботата вечерта беше донесена одлука засега да се одложи американската воена акција, објави CBS News, повикувајќи се на извори запознаени со разговорите.
За време на состанокот со советниците за национална безбедност во средата, Трамп покажа дека не е склон кон започнување напад.
Сепак, откако саудискиот престолонаследник Мохамед бин Салман во четвртокот го повтори барањето за американска помош против Хутите, Трамп му нареди на Пентагон да се подготви за воздушни напади, наведоа изворите.
Бин Салман претходно, десет дена порано, упатил исто такво барање до Трамп.
Одлуката за одложување на американската акција беше донесена во саботата навечер; според изворите, Белата куќа во моментов не сака дополнително да го проширува опсегот на конфликтот.
Трамп во понеделникот телефонски разговараше со Рашад ал-Алими, шефот на Претседателскиот совет за раководење на Јемен – извршното тело на меѓународно признатата јеменска влада – но не даде директно ветување за американска воена поддршка во борбата против Хутите, потврдија повеќе независни извори за Ројтерс.
Во услови на ескалација на конфликтот во последните недели, Хутите зазедоа значајна стратешка територија – особено долж брегот на Црвеното Море – која претходно беше под контрола на јеменските сили поддржани од Саудиска Арабија. Еден јеменски и еден западен извор изјавија дека Алими побарал американска поддршка за својата влада – која е поддржана од Саудиска Арабија – во борбата против Хутите, кои за време на офанзивата овој месец зазедоа клучни области долж теснецот Баб ел-Мандеб.
Трамп претходно изјави дека САД се во контакт со Хутите и дека групата сигнализирала оти нема да ги напаѓа американските бродови.
CBS News: Трамп разгледуваше можност за воена акција на САД во Јемен

