Парламентот на Косово усвои декларација во врска со првостепената одлука на Специјализираните совети на Косово во Хаг против поранешните лидери на Ослободителната војска на Косово (ОВК) Хашим Тачи, Кадри Весели, Јакуп Красниќи и Реџеп Селими, објави Н1.
Декларацијата, поднесена од Демократската партија на Косово, а потоа договорена од сите албански парламентарни групи, доби поддршка од 99 од вкупно 120 пратеници (20 места се резервирани за претставници на малцинствата).
Во документот се изразува длабока загриженост за одлуката на судот, наведувајќи недостаток на транспарентност и кршење на стандардите за фер судење. Исто така, се отфрлаат наодите за заедничка криминална намера и индивидуална одговорност што им се припишуваат на четворицата поранешни водачи на ОВК.
Декларацијата ги повикува државните институции да ја заштитат – според формулацијата во текстот – вистината и достоинството на војната што ја водеше ОВК, преку заедничка стратегија што вклучува правни, институционални и дипломатски мерки.
Документот потсетува на интервенцијата на НАТО и соработката на Алијансата со ОВК.
Се наведува дека специјализираните панели ги надминале своите овластувања, а обидите за поткопување на историскиот наратив за Косово се отфрлаат .
Парламентот се обврза да ја брани својата верзија на настаните, која косовските Албанци ја сметаат за војна за ослободување.
Потсетуваме дека Специјализираниот суд за Косово го прогласи поранешниот претседател на земјата, Хашим Тачи, за виновен за воени злосторства. Тој беше осуден на 25 години затвор.
Тачи , 58, беше осуден за убиства, тортура и нелегално притворање извршени во својство на врховен командант на ОВК за време на турбулентното отцепување на територијата од Србија во 1990-тите.
Трибуналот го прогласи за виновен за убиство на 96 политички противници и лица за кои се верува дека се соработници на српските безбедносни сили, извршено од силите на Ослободителната војска на Косово за време на војната со Србија.
Тачи ги негираше сите обвиненија.
Српскиот претседател Александар Вучиќ изјави дека не треба да има еуфорија околу пресудите.
Според него, судот не утврдил основа за обвинение за голем или систематски напад врз цивилното население, бидејќи не сакал да го поткопа авторитетот на ОВК.
„Севкупно, не бевме доволно подготвени да се соочиме и со сопствените грешки и со злосторствата извршени во наше име“, рече Вучиќ.
Тој нагласи дека зачувувањето на мирот и стабилноста е клучно за Србија. Тој, исто така, истакна дека бидејќи ова е прашање на Специјализираните совети – кои работат во рамките на косовскиот правен систем, иако со седиште во Хаг – дури и ако пресудата биде потврдена на втор степен (сценарио во кое „тешко му се верува“), останува можноста за „трето ниво“ на судска ревизија.
Ова ниво е Уставниот суд на Косово, кој би можел да го врати случајот на ново судење во прв степен ако утврди дека правата на Хашим Тачи – или на кое било друго осудено лице – биле повредени за време на првичното судење или жалбената постапка.

