Енергетските пијалоци, иако неалкохолни, можат да имаат штетни последици по здравјето, особено во случај на прекумерна консумација, се согласуваат и медицинските лица. Ова е причината зошто соседна Хрватска планира целосно да им забрани на малолетниците да купуваат и конзумираат енергетски пијалоци, кои се исто така широко достапни во Македонија за сите возрасти.
Хрватското Министерство за здравство наскоро целосно ќе забрани купување и консумирање енергетски пијалоци од страна на малолетници, пишува Н1.
Во образложението на нивниот нацрт-закон за ограничување на употребата на енергетски пијалоци и производи слични на енергетски пијалоци од страна на лица под 18 години, се посочува дека енергетските пијалоци имаат бројни негативни ефекти врз здравјето, а децата се изложени на поголем ризик од возрасните кога станува збор за штетните последици од нивната консумација.
„Иако пијалоците со висока содржина на кофеин мора да го носат предупредувањето „Не се препорачува за деца, бремени жени и доилки“, истражувањето на Хрватскиот институт за јавно здравје покажа дека голем процент од студентите ги консумираат овие производи, при што значителен дел од нив консумираат големи количини (750 мл или повеќе). Покрај пијалоците, постојат и производи кои – иако не се класифицирани како пијалоци – наликуваат на енергетски пијалоци во однос на нивниот состав или физиолошки ефекти, а можат да доведат и до штетни последици за малолетниците“, се наведува во образложението.
Во Република Хрватска, се наведува, енергетските пијалоци се широко достапни, а нивната консумација кај децата и малолетниците станува сè почеста. Бројни стручни и научни наоди укажуваат на потенцијални штетни здравствени последици од прекумерната консумација на енергетски пијалоци кај малолетниците, првенствено поради високата содржина на кофеин, шеќер и други стимулативни состојки.
„Овој вид на консумирање може негативно да влијае на кардиоваскуларниот и нервниот систем, како и на менталната состојба, и да го зголеми ризикот од други здравствени проблеми. Донесувањето на Законот за ограничување на употребата на енергетски пијалоци и производи слични на енергетски пијалоци за лица под 18 години е неопходно заради нормативно регулирање на област која во моментов е недоволно регулирана, а која е од големо значење за заштитата на здравјето на малолетниците“, велат од Министерството за здравство таму.
Законот, како што е наведено, ќе ги регулира условите за пласирање на енергетски пијалоци на пазарот, нивното етикетирање и рекламирање, а ќе пропише и забрана за продажба, послужување и овозможување на консумирање на енергетски пијалоци од страна на малолетници, „како и други мерки насочени кон спречување на пристап на малолетници, а сето тоа со цел заштита на нивното здравје“.
Каква е ситуацијата во Македонија?
Енергетските пијалоци се широко достапни во МАкеоднија , а потенцијалната забрана за нивна консумација за млади луѓе беше само спорадично споменувана во јавноста.
Енергетските пијалоци се лесно достапни да се купат, а младите често ги злоупотребуват, пиејќи во големи количини или ги мешаат со алкохол, што е опасно по здравјето. Оваа проблематика беше разгледувана на петтиот состанок на Националниот совет за безбедност на храна, што се одржа пред повеќе години. Во минатото (во 2008/2009 година) постоеше краткотрајна законска одредба со која се ограничуваше продажбата на енергетски пијалоци заедно со алкохолот во ноќните часови (од 19:00 до 06:00 часот) и во киосци, но таа подоцна беше укината. Исто така, во Собранието на Република Северна Македонија беа поднесувани предлог-измени за забрана на продажба и купување на енергетски пијалоци за лица под 18 години, но тие никогаш не беа усвоени како важечки закон
Апели од лекарите.
Во домашната јавност, дебатата најчесто ја поттикнуваат лекарите, педијатрите и токсиколозите (како експертите од Клиниката за токсикологија), кои редовно предупредуваат дека млади лица завршуваат на лекарска интервенција поради тахикардии и висок притисок предизвикани од прекумерно пиење енергетски пијалоци или нивно мешање со алкохол.
Притисок од регионот.
Дебатата во Македонија добива нов импулс поради сè поригорозните мерки кај соседите. На пример, Косово усвои законски измени за забрана на енергетски пијалоци за лица под 18 години, а во Бугарија и Хрватска исто така се покренаа сериозни законски иницијативи за целосна забрана на нивната продажба на малолетници.

