Американскиот претседател Доналд Трамп за време на средбата со кинескиот лидер Си Џинпинг предложи одржување трилатерални разговори меѓу Вашингтон, Москва и Пекинг посветени на контролата на вооружувањето.
„Претседателот Трамп се заложи за трилатерални разговори за контрола на вооружувањето меѓу САД, Русија и Кина“, соопшти Белата куќа.
Си неделава престојуваше во државна посета на САД, при што во два наврати на 24 и 25 септември имаше средби со Трамп во Белата куќа.
Рускиот заменик-министер за надворешни работи Сергеј Рјабков неодамна изјави дека Кина има јасна позиција за контрола на вооружувањето и дека Русија ја почитува.
„Нашите кинески колеги застапуваат исклучително конзистентна, јасно артикулирана и недвосмислена позиција, која ја третираме со големо почитување. Во суштина, нивната позиција е дека немаат намера да се приклучат на одредени формати во оваа област, во кои Вашингтон и Москва традиционално играле водечки улоги“, рече Рјабков.
Тој додаде дека Пекинг смета дека негово учество во преговори од овој формат е „прерано и несоодветно“.
Од друга страна, САД се обидуваат да ја убедат Кина да се вклучи во преговорите на нуклеарните сили за контрола на вооружувањето.
Според Рјабков, Москва ги забележува овие разлики и наведува дека токму пристапот на Вашингтон, а не ставот на Пекинг, претставува „главна пречка за потенцијален мултилатерален дијалог за нуклеарните арсенали“.

