Политичките партии и функционерите да се воздржат од јавната реторика со која се нарушува самостојноста на јавните обвинители во одлучувањето – велат од Здружението на јавните обвинители по лавината реакции во јавноста, вклучително и од политичари и функционери, со кои беше искритикувана одлуката на поранешниот прв вицепремиер Артан Груби да му биде одреден куќен наместо ефективен притвор.

„Изминатите денови сведоци сме на неодговорни изјави со кои одредени политичари селектираат и прозиваат поединечни јавни обвинители, коментирајќи ги јавнообвинителските одлуки без воопшто да бидат запознаени со конкретен предмет и доказите. Ова кулминираше во политичките коментари во однос на определена мерка куќен притвор за еден од осомничените во предметот ‘Државна лотарија’“ велат од Здружението додавајќи дека политичарите и функционерите мора да го почитуваат и да не го загрозуваат начелото за поделба на власта и да се воздржат од ваквата реторика.

Оттаму посочуваат дека како Здружение немаат овластување да ги коментираат одлуките на јавните обвинители по конкретни предмети, но имаат право и обврска да ја заштитат самостојноста на обвинителите.

Меѓу низата коментари и критики во врска со враќањето на Груби и одлуката да му биде изречен куќен наместо ефективен притвор, е и вчерашната изјава на министерот за правда Игор Филков, кој ги повика Судскиот совет и Советот на јавни обвинители да свикаат итни седници и да утврдат дали има елементи за одговорност кај јавниот обвинител и кај судијата кој побарал, односно ја изрекол мерката куќен притвор за Груби.