Израел утрово го бомбардираше Техеран додека Иранците го славеа Норуз, персиската Нова Година. По нападите, израелскиот премиер Бенјамин Нетанјаху ги негираше тврдењата дека го „ввлекол“ американскиот претседател Трамп во војна со Иран.
Активистите известуваат за експлозии околу иранскиот главен град. Нападите доаѓаат само еден ден откако Израел вети дека ќе се воздржи од понатамошни напади врз клучно иранско гасно поле, додека Иран ги засили нападите врз нафтените и гасните постројки во Заливот.
Прашања за сојузништвото меѓу САД и Израел
Најновите напади покренуваат повеќе прашања за усогласувањето на воените цели на САД и Израел. Нетанјаху изјави дека Израел дејствувал независно кога го бомбардирал иранското гасно поле Јужен Парс и потврди дека Трамп го замолил Израел да се воздржи од такви напади.
Според него, Иран е „десеткуван“ и повеќе нема капацитет да збогатува ураниум или да произведува балистички ракети. Сепак, додаде тој без понатамошно разјаснување, за револуција во земјата би била потребна „копнена компонента“.
Нетанјаху: На Трамп не му требаше убедување
Израелскиот премиер, исто така, ја отфрли идејата дека го вовлекол Трамп во конфликтот, имплицирајќи дека тој бил помлад партнер во заедничкиот напад врз Иран.
„Дали некој навистина мисли дека некој може да му каже на претседателот Трамп што да прави?“, праша Нетанјаху новинарите на прес-конференција.
„Нему не му требаше никакво убедување“, додаде тој. „Не мислам дека двајца лидери биле толку координирани како претседателот Трамп и јас. Тој е лидерот. Јас сум негов сојузник.“
