На социјалните мрежи се појавија снимки од престојот на поранешниот унгарски премиер Виктор Орбан на фестивалот на трубите во српското место Гуча во друштво на двајца истакнати унгарски бизнисмени, јави Нова.рс.
Унгарскиот истражувачки новинар Саболч Пањи, кој и самиот сподели видео на социјалните мрежи, наведе дека Орбан е придружуван од заменик-генералниот директор на унгарската нафтена компанија МОЛ, Оскар Вилаги и главниот дизајнер на контроверзниот имот Хатванпушта, Даниел Тарацки.
Според медиумските извештаи, Орбан бил во „видливо добро расположение“ додека шетал со пријатели без обезбедување, при што неколку минувачи го препознале и побарале да се фотографираат со него.
Меѓу објавените снимки беше и една за која се тврди дека прикажува како Орбан пие домашна ракија од сливи, позната како „шљивовица“.
Оскар Вилаги е унгарски милијардер по потекло од Словачка. Покрај што е втор човек на МОЛ, тој е и мнозински сопственик на фудбалскиот клуб ДАЦ 1904 од Дунајска Стреда. Според Пањи, Вилаги и Орбан се блиски пријатели со години, а нивниот однос не е нарушен дури ни по промените на власта во Унгарија.
Архитектот Даниел Тарацки е главен дизајнер на имотот Хатванпушта, поврзан со семејството на Орбан и со години е предмет на политички спорови во Унгарија. Покрај овој проект, според унгарски медиуми, фирмата на Тарацки добивала и договори за бројни градежни проекти финансирани со државни пари, што му овозможи да стекне значително богатство и статус на милијардер.
