Кина денес ги отфрли обвинувањата на американскиот претседател Доналд Трамп дека се обидела да влијае на изборите во САД и дека добила милиони податоци за гласачите во САД, нагласувајќи дека не се меша во внатрешните работи на други земји.
Портпаролот на кинеската амбасада во САД во одговор на CNN нагласи дека Кина постојано се придржува до принципот на немешање во внатрешните работи на други земји.
„Изборите во САД се внатрешно прашање на Соединетите Американски Држави. Нивниот исход е определен од гласовите на американскиот народ“, рече портпаролот.
Тој додаде дека „Кина никогаш не интервенирала и никогаш нема да интервенира во претседателските избори во САД“.
Пекинг постојано ги отфрла обвинувањата за мешање во изборните процеси и политичките прашања упатени против него од страна на Соединетите Американски Држави, како и Австралија, Канада и Обединетото Кралство.
Претседателот на Соединетите Американски Држави, Доналд Трамп, претходно во обраќање до нацијата изјави дека Кина нелегално добила податоци за околу 220 милиони американски гласачи и се обидела да влијае на претседателските избори во 2020 година, осврнувајќи се на документи што администрацијата ги декласификуваше и ги објави на веб-страницата на Белата куќа.
Трамп ја обвини Кина за мешање во изборите во 2020 година. Разузнавачките извори го негираат тоа
Трамп истакна дека новообјавените документи покажуваат дека Кина извршила, како што изјави, „најголемото компромитирање на изборни податоци во историјата“, наведувајќи дека добила евиденција на гласачи што ги содржи имињата, адресите, телефонските броеви, контакт информациите и партиската припадност на американските гласачи.
Според неговите тврдења, Кина наводно се обидела да ја ослабне неговата прва администрација и да влијае на неговата претседателска кампања во 2020 година, како и на конгресните избори во 2018 година.
„Кинеската влада сакаше да ги изгубам изборите затоа што знаеја дека нивните намери ми се јасни“, рече Трамп.
