Документарниот филм „Господин Никој против Путин“, кој ја следи приказната на основношколски наставник што ја документирал индоктринацијата на своите ученици за поддршка на руската инвазија врз Украина, го освои Оскарот за најдобар документарен филм.

Наградата ја примија Павел Таланкин, кој сега живее во егзил во Европа, и американскиот ко-режисер на филмот Дејвид Боренштајн.

Филмот го победи фаворитот „Совршениот сосед“, како и другите номинирани документарци „Решението за Алабама“, „Дојди да ме видиш во добрата светлина“ и „Сечејќи низ карпи“.

Боренштајн во својот говор им се заблагодари на семејството, пријателите, Академијата и на останатите номинирани.

„Ова е филм за тоа како се губи една земја“, рече тој.

„Она што го видовме работејќи со овие снимки е дека земјата се губи преку безброј мали акти на соучесништво.“

Тој додаде дека кога владите убиваат луѓе на улиците, кога олигарсите ги преземаат медиумите и кога општеството молчи, сите се соочуваат со морален избор.

„Но, за среќа, дури и еден ‘никој’ е помоќен отколку што мислите“, рече Боренштајн.

Павел Таланкин испрати порака во име на земјите каде што, како што рече, наместо ѕвезди на небото се гледаат бомби и беспилотни летала.

„Во името на нашата иднина, во името на сите наши деца, запрете ги сите овие војни сега“, порача тој.

Ова е третпат во оваа деценија документарен филм критичен кон руската влада да ја освои оваа награда, по филмот „Навални“ во 2023 година и „20 дена во Мариупол“ во 2024 година.

Минатата година Оскарот за најдобар документарец го освои „Нема друга земја“, израелско-палестинска копродукција за уништувањето на една палестинска заедница на Западниот Брег.

Зборувајќи пред новинарите по доделувањето на наградата, Боренштајн направи и паралела меѓу политичките процеси во Соединетите Американски Држави и Русија.

„Работејќи со руски колеги често се обидував да ја споредам ситуацијата во Америка со онаа во Русија“, рече тој.

„Но многу мои руски пријатели ми велеа дека работите во Америка се случуваат побрзо отколку што се случуваа во Русија. Трамп се движи многу побрзо отколку што се движеше Путин во своите рани години“, изјави Боренштајн.