Ззаконските измени со кои се предлага пратениците да имаат само македонско државјанство денеска се на дневен ред на собраниската Законодавно-правна комисија.
Според собранискиот сајт, седницата е закажана во 11:30 часот, а како што може да се види од сајтот, има поднесено повеќе амандмани.
Законските измени се носат по скратена постапка, а беа поднесени од пратеници од владејачкото мнозинство откако опозициската СДСМ обвини дека пратеници од ВМРО-ДПМНЕ имаат бугарски пасоши.
Бојан Стојаноски, еден од предлагачите на законските измени, во телевизиско гостување рече дека тоа е стара вест која била актуелна пред пет години кога тогашен министер за одбрана, а сегашен поранешен политичар во Бугарија, набројал неколкумина кои наводно имаат бугарско државјанство.
– Јас лично не демантирав, затоа што сметав дека не треба да се даде внимание на оваа тема, но со колегите разговаравме и одлучивме да ја пресретнеме оваа лага и уште еднаш да покажеме пред јавноста со што се служи СДСМ и на кое ниво е падната таа политичка партија. Затоа го поднесовме овој закон со идентичен текст како пред 5 години, кој тогаш коалицијата СДСМ и ДУИ не го поддржа, изјави Стојаноски.
Свои законски измени поднесе и опозицијата со кои бара двојното државјанство да биде забрането и за претседателот на државата и Владата.
