Синдикатот на УПОЗ бара од Судскиот совет да постапи по претставките поднесени од вработени во Основниот суд во Куманово кои, како што тврди, со години се соочуваат со навреди и психички притисоци од претседателката на Судот Снежана Манев.
Бараме Судскиот совет веднаш да постапи по претставките и да ги заштити вработените, изјави претседателот на УПОЗ Трпе Деаноски пред Основниот суд во Куманово.
Деаноски речче дека до Судскиот совет и Министерството за правда биле доставени претставки од вработените, но при посетата на двајца претставници на Судскиот совет наместо да ги разгледуваат наводите, ги повикувале вработените поединечно да потврдат дали потписите се нивни.
Доколку не се преземат мерки, вработените се подготвени за протести, а не се исклучува и штрајк.
Обвинувањата на Синдикатот на УПОЗ ги демантираше претседателката на Судот посочувајќи дека протестот бил организиран од судски администратор, претседател на синдикатот, службеник и неколкумина вработени. Поводот за протестот, според неа, е дисциплинската постапка против судскиот администратор за, како што вели, несовесно, ненавремено или небрежно вршење на работните задачи.

